Папата Франциск во Вашингтон со апел за помош на сиромашните, дискриминираните, бегалците

Со извици на добредојде и лично од американскиот претседател со семејството, Папата Франциск ја започна првата посета на САД. Четвртиот по ред папа којшто ја посетил Америка донесе порака за помош на сиромашните, дискриминираните, бегалците и имигрантите. Папата со личен пример возејќи се во стар Фиат покажа скромност и побара светот да се справи со климатските промени. Во Белата куќа над 15 илјади поканети го слушнаа првиот говор на Папата на англиски.

„Се радувам на дијалогот и размената на мислења, надежи и сништа со американскиот народ. Ќе имам чест да зборувам во Конгресот и се надевам како брат на оваа земја, ќе понудам зборови на охрабрување за враќање на нацијата кон принципите врз кои е основана. Исто така ќе патувам во Филаделфија на 8-от Светски состанок на семејствата за да ја прославам и поддржам институцијата на бракот и семејството во овие критични моменти од историјата на нашата цивилизација“, изјави папата Франциск, поглавар на Римокатоличката црква.

„Не потсети дека најмоќната порака на Господ е милоста. Тоа значи да ги дочекаме странците со отвореност, добредојде за бегалците од места погодени со конфликти и имигрантите коишто ги напуштаат родените земји барајќи подобар живот. Да покажеме сочуство кон оние коишто се дискриминирани, страдаат, не потсети на цената на војната врз немоќните и коишто не можат да се одбранат, за да се стремиме кон мир“, рече американскиот претседател, Барак Обама.

Илјадници Американци од целата држава дојдоа во главниот град да го видат и поздрават Папата во неговиот папамобил. 

„Прекрасно е што е овде и што дојде да не посети. Среќни сме што го гледаме.“

„Возбудена сум и навистина е чест да бидам овде. Немам зборови“, велат граѓаните.

Папата беше поздравен во Вашингтон и од негови сонародници од Аргентина:

„Сметаме дека сме многу добро претставени од Папата Франциск. Благословени сме да го видиме денеска и навистина сме среќни да бидеме овде.“

„Аргентискиот народ смета дека Папата е Аргентинец, но е и папа за целиот свет. Затоа сме многу среќни што сме овде и го чекаме.“

Папата Франциск одржа заедничка миса со свештениците од катедралата Свети Метју Апостол, ги посети центрите за сиромашните, Католичкиот универзитет и одржа прва миса во Базиликата. Освен обраќање во Конгресот, тој ќе зборува и пред Генералното Собрание на Обединетите нации во Њујорк, а посетата на САД ќе ја заврши со посета на Филаделфија, од каде потекнала и поканата на Католиците од овој град да ја посети нивната држава.

Посетата на Папата Франциск помина со најголеми и највисоки мерки на безбедност поради заканите од терористички напади.

Ирина Гелевска, постојан дописник од Вашингтон за МРТ