Индустријата сигнализира дека ќе имаме добар раст

Растот на индустриското производство од 12,7 проценти во август и солидната позитива од 8,4 отсто кај преработувачката индустрија е знак дека годинава ќе имаме добар економски раст, какви што се и очекувањата на светската банка во последниот извештај – оценува првиот финансиер, Зоран Ставрески. Според него, политичката стабилност и долгорочните економски политики се најдобри услови за развој на бизнисот.

„Стопанствениците ги гледаат долгорочните политики како стабилни и како добри, а пред се даночната политика и политиката во делот на работните односи, како и мерките како што е „Македонија вработува“, привлекувањето на странските инвестиции и другите економски политики. Имаме раст и во работењето на странските компании кај производството на машини и опрема, но и во сегментот на традиционалните индустриски дејности како што текстилната, производството на мебел, тутунската“, смета вицепремиерот и министер за финансии, Зоран Ставрески.  

Според вицепремиерот Ставревски, причина за остварениот раст е и буџетот со добрата ликвидност и редовното сервисирање на обврските кон стопанството.

„Очекувам македонската индустрија да ја заврши 2015-та година со добра стапка на раст, што ќе биде составен дел на вкупниот раст на македонската економија и ќе влеземе во 2016 година со стапка на раст која ќе биде меѓу највисоките во регионот“, потенцира Ставрески.

Оптимизмот го подгреваат и најавите за новите инвестиции кои се подготуваат за старт на производство.. Резултати даваат и новите владини мерки. Преку „Македонија вработува“, 4.000 компании ангажирале над 6.100 лица, а инвеститорите отвориле над 13.000 работни места.

Поттик на индустријата ќе и даде и буџетот за идната година. Парите за капиталните прокети се проектирани на досега највисоки 400 милиони евра или 12,9% повеќе од лани.

Сунчица Николоска