Самовработување: 207 милиони денари за 920 бизниси во 2016-та

Малите бизниси ќе добијат шанса да се развиваат и во наредната година. Нови 207 милиони денари грант се обезбедени за проектот за самовработување, за наредната година. Се очекува отворање на нови 920 бизниси и околу 1.000 работни места.

Според владиниот портпарол Ѓорѓиев, парите ќе бидат доделени преку два отворени огласи од кои првиот се очекува да биде распишан на почетокот на наредната година. Државата во соработка со УНДП дава 3.000 евра неповратен грант за отворање на бизнис и самовработување на невработените.

„Имајќи ги во предвид позитивните резултати од проектот „Самовработување“, одлучено е тој да продолжи и во 2016 година за којашто цел се определени 207 милиони денари, со кои се планира отворање на 920 нови бизниси. Имајќи во предвид дека искуството покажува дека во дел од овие бизниси се вработуваат и две и три лица, се очекува да бидат вработени преку овој проект околу 1000 лица“, изјави владиниот портпарол Алексанадар Ѓорѓиев.   

Во првата половина на годината, 500 луѓе кои ги исполнија условите добија државна помош и веќе започнаа со функцонирање на бизнисите. Според Ѓорѓиев, идната недела и останатите 400 ќе ги добијат сертификатите.

Фирмите кои се отвораат преку овој проект може да ги користат и останатите владини мерки, вели Ѓорѓиев, како проектот „Македонија вработува“ преку кој државата ги ослободува работодавачите од плаќање на придонесите. Со овој проект се отворија над 7.200 бизниси.

Дијана Ценевска