Отворен оглас за директор на Агенцијата за туризам

Се бара нов директор кој ќе раководи со Агенцијата за промоција и поддршка на туризмот. Ќе ги координира активностите поврзани со создавање подобри услови за експанзија на македонските туристички потенцијали. Ќе ја претставува и раководи  институцијата која има сѐ позначајна улога во органиизрано претставување на домашниот туризам на најважните светски саемски манифестации и координирање на активностите со економските промотори и дипломатско конзуларните претставништва.

Годинава туризмот бележи експанзија. Бројот на странски туристи во јули е зголемен  за 16,1% во однос на истиот месец лани. Расте бројот и на домашните туристи кои претстојувале во домашните хотели за 7,5%.

„Агенцијата за туризам има битна улога во овој систем и затоа сите кои ги исполнуваат условите од огласот се повеќе од добредојдени да аплицираат на огласот кој трае до 15-ти октомври и со својата енергија, со своите идеи, способност и квалитет да придонесат во продолжувањето на овој позитивен тренд на раст и развој“, изјави владиниот портпарол, Александар Ѓорѓиев.

Од кандидатите се бара да имаат високо образование, меѓународен сертификат за познавање на англиски јазик и пет години работно искуство.

Освен огласот за директор на Агенцијата за промоција и поддршка на туризмот, во тек е јавниот оглас за раководно лице на уште една атрактивна институција. Станува збор за Агенцијата за електронски комуникации, која е независно регулаторно тело.

Свето Николовски