Промовирана монографијата „Прилеп- милениумско пулсирање 1014-2014“
Прилеп доби капитално дело. Во монографија насловена „Прилеп-милениумско пулсирање“ е раскажана богатата илјадалетна историја, но и култура на градот под Марковите кули...
На 600 страници се раскажани илјадагодишната историја, култура и напредок на Прилеп. Градот за прв пат доби сеопфата монографија насловена „Прилеп -милениумско пулсирање 1014-2014“.
„Оваа монографија ја доживувам како заслужен и достоинствен подарок по повод илјадалетието на градот Прилеп и како неизоставен и високовреден дел од прилепската и македонската колективна меморија“, вели Слободан Беличански, промотор на Монографијата.
Монографијата трајно ќе ја зачува приказната која пред илјада години почнала со Прилапон, а денес живее со модерен Прилеп.
„Може да се нарече енциклопедија на град Прилеп која ќе служи од аспект на историја, едукација, од сите можни потреби кои ќе ги интересираат и граѓаните, обичниот човек, па и едуцираните луѓе“, изјави Љупчо Попоски, претседател на Друштвото за наука и уметност на Прилеп.
Ова капитално дело е за минатото, но уште повеќе за иднината на градот.
„Многу ќе важи за сегашниот и иден развој на градот, но ќе значи и за потсетување на се она што се случило во претходните илјада години, да се потсетиме и сегашните, и идните генерации“, рече Марјан Ристески, градоначалник на Прилеп.
40 стручњаци- прилепчани на монографијата работеа две години.
Елизабета Митреска