Пет милиони евра во ИПА фондовите за реконструкција на 11 железнички станици

Од ИПА фондовите на ЕУ наменети за Република Македонија околу 5 милиони евра се наменети за реконструкција на 11 железнички станици долж Коридорот 10, вклучувајќи ги и оние во Скопје, Велес и Демир Капија, соопштуваат од Министерството за транспорт и врски и делгацијата на ЕУ во земјава.

Министерството за транспорт и врски има тесна соработка со Делегацијата на Европската унија во Република Македонија во насока на подобрување на железничката мрежа во земјата, а со цел да се подобри мобилноста на граѓаните и материјалните добра по должината на Коридорот 10.

ЕУ е свесна за важноста на овие проекти, наменети пред се за доброто на граѓаните со оглед дека железничката мрежа е една од основите за целокупниот понатамошен развој на земјата. Коридорот 10, како дел од проширувањето на мрежата на Трансевропски транспортни коридори во Западен Балкан, е еден од приоритетите на ЕУ, стои во соопштението.