Македонија формира коридор за заштита и помош

28.11.2015 11:19

Оваа одлука подразбира да се преземат сите мерки и чекори за да се обезбеди канализирање на протокот на бегалците, што вклучува и подигнување на заштитна ограда на границата, велат од Владата, и потенцираат дека границата ќе остане отворена...

Врз основа на предлог и известување на Групата за проценка на ризици со која претседава директорката на ЦУК, Сузана Салиу, Управувачкиот комитет за менаџирање на состојбите со бегалците на вчерашната седница одлучил да се операционализираат заклучоците од националниот Совет за безбедност, и на јужната граница со Грција да се преземат сите техничко-тактички мерки за насочување на протокот на бегалците кон контролните пунктови заради регистрација и хуман третман, потврдуваат од Владата.

Оваа одлука подразбира да се преземат сите мерки и чекори за да се обезбеди канализирање на протокот на бегалците, што вклучува и подигнување на заштитна ограда на границата, велат од Владата, и потенцираат дека границата ќе остане отворена.

Сакаме да потенцираме дека границата ќе остане отворена, ќе се пропуштаат сите бегалци кои се од регионите зафатени со воени конфликти како и досега што се пропуштаат. Ќе продожиме да се координираме со другите земји и понатаму, велат од Владата.

Според нашите информации на почетокот заштитната ограда ќе биде подигната на одредени потези на јужната државна граница.

АРМ веќе започна со изградба на оградата чија единствена цел е насочување.

Македонија со ова помага на мигрантите, но и на Европа и во подобро организирање и канализирање на мигрантите преку различни форми на стеснувања и организација на рутата со дополнително зголемување на безбедноста на земјите, но и на мигрантите, хуман третман, а со цел да се минимизираат и сите безбедносни ризици, истакнуваат од Владата на Република Македонија.

Во Управувацкиот комитет членуваат министерот за здравство Тодоров кој е и претседател, министерот за одбрана Јолевски, министерот за внатрешни работи Спасовски, министерот за транспорт и врски Мисајловски, заменик- министерот за внатрешни работи Чавков, претставници од Владата, кабинетот на премиерот на Република Македонија, АРМ и други институции.