Пензионерите со апел да не се проблематизира исплатата на пензиите

Во Македонија има околу 300 илјади пензионери и  тие досега во овие 9 години, земаат пензија редовно до 6-ти во месецот. Затоа од Сојузот на здруженијата на пензионерите апелираат политичките партии да ги надминат недоразбирањата и да не се загрози редовната и навремена исплата на пензиите. Сето ова се случи откако дополнителниот заменик- министер за финансии, Кире Наумов стави вето на висината и рочноста на најавената емисија државни записи.

„Оваа најава што дојде многу ги возбуди пензионерите, дека нема да ги се земат пензиите во тој период. Мојот став и ставот на Сојузот и на луѓето што ми се јавија денеска  и реагираа е да нема пречка кога се во прашање пензиите. Затоа што од пензиите во Македонија живеат околу милион луѓе, две генерации секој пензионер има за издржување и тоа ќе биде голем проблем. Треба трезвено да се размислува, да се надминат сите политички пречки во врска со ова и пензионерите редовно да си ги добиваат своите пензии кои ги заработиле со труд“, изјави Драги Аргировски-претседател на Сојузот на Здруженија на пензионери на Македонија.

Владата е децидна, станува збор за редовно сервисирање на обврските за да се премостат временските јазови меѓу приливите на средства во буџетот и расходите кои се најголеми во почетокот на месецот, поради исплати на плати, пензии и социјални надоместоци. Додека уплатите на даноци се реализираат по 15-ти односно 25-ти во месецот.

„Јас би апелирал уште еднаш до сите политички партии, посебно до СДСМ за разумно однесување во склоп на ингеренциите што следат според законот  и ингеренциите на дополнителните заменици министри да не се злоупотребуваат  истите на штета на  македонското стопанство и на македонските граѓани. Тие ингеренции се повзани со периодот на организација на избори и со прашања поврзани со организација на избори додека финансирањето на буџетот  и издавањето домашни хартии од вредност е редовна активност која се применувала во сите изминати години, од 2004-та кога Владата на СДСМ ги воведе тие аукции, до ден денешен“, рече вицепремиерот и министер за финансии, Зоран Ставрески.

Станува збор за вообичаена процедура која ја користеле сите Влади досега, вели  Ставрески, а редовното сервисирање на буџетот е загарантирано и е законска обврска. Ресорниот министер од собраниската говорница повика  да преовлада разумот, а не тесните политички интереси.

Свето Николовски