Обвинителство: Почнува анализата на фалсификуваните документи

Десетици илјади прислушувани разговори се пронајдени во компјутерите на осомничените во случајот со фалсификуваните документи, потврдуваат од јавното обвинителство. Ќе им бидат потребни околу два месеци за да ја анализираат нивната содржина. Засега не се соопштува што утврдила првичната истрага, ниту пак чии разговори се прислушувани и какво е нивното потекло.

„Обвинителите кои постапуваат по предметите досега дадоа наредби за преземање истражни дејствија до Одделот за организиран криминал при МВР и организационите единици при МВР кои се надлежни за различни видови на вештачења. Во текот на истражните дејствија дадени се наредби за вештачење, претреси и разговори со повеќе лица за утврдување на фактичката состојба“, изјави Јован Цветановски, заменик- јавен обвинител.

Обвинителот потврди дека запленетите машини за фалсификување лични карти како и материјалите пронајдени во компјутерите на осомничените одговараат со оние кои беа објавени во печатен медиум, но и со материјалите од аферата со фалц- пасошите од ноември минатата година.

„Пронајдени се машини и опрема, и тоа преси, секачи и компјутерска опрема за изготвување на фалсификувана документација“, соопшти Цветановски.

За случајот со фалсификуваните документи, оформени се неколку предмети на кои работат повеќе обвинители. Цветановски потврди дека се води истрага против три лица. Освен Захир Бекири кој е во затвор за друго кривично дело, на останатите двајца осомничени како превентивна мерка им се одземени пасошите.

Анита Димитријевска