Несторовски каратист на годината, Стојановски реизбран за претседател

Карате федерацијата на Македонија последниве неколку години се етаблира како една од водечките спортски организации и во земјава, препознатлива и во меѓународните организации. Синоќа беа прогласени најдобрите во 2015 година, во која одново беа остварени завидни резултати. За најдобар каратист е избран Мартин Несторовски, кој освои бронзен медал на Првите Европски игри во Баку во најтешката категорија +84 кг, а беше носител на бронза и на јубилејното 50 Европско првенство во Истанбул. За нијанса зад него е знаменосецот од Европските игри Емил Павлов кој на Македонија исто така и донесе бронзен трофеј од Баку, натпреварување во кое од македонските претставници во 9 спортови, единствено каратистите се закитија со медали. Најдобра сениорка е Наташа Стефановска, пред Поликсенија Јованоска и Симона Заборска. Најдобри помлади сениори се Фери Исиќ во машка и Бојана Јанева во женска конкуренција. Кај јуниорите најуспешни се Петар Заборски и Маријана Димоска, а кај кадетите Фаик Весели и Вероника Костовска. Најуспешен тренер е Мирче Јанушевски, а неговиот клуб Металург ги доби почестите за најдобра екипа.

Прогласувањето на најдобрите беше завршен чин на карате денот, во кој претходно на Изборното Собрание едногласно беше избран старо-новиот претседател Драган Стојановски, под чие раководство федерацијата ги оствари најголемите успеси во историјата. По освојувањето на голем број трофеи во континуитет од европските и светските шампионати како и од првите Европски игри во изминатите 8 години, следна висока цел е освојување на Олимписки медал во Токио, со оглед на тоа што според многу параметри каратето ќе влезе во програмата за ОИ во 2020 година.