Православните верници вечерва ќе слават Стара Нова година

Православните христијани кои се водат според Јулијанскиот календар вечер ќе ја пречекаат Православната нова година. Многу семејства ja подготвуваат софрата како за Новогодишната ноќ. Во кафеаните и рестораните се одвиваат подготовки за пречекот. Менаџерите велат дека се уште се почитува традицијата да се прославува Старата нова година и интересот кај луѓето е голем. Се прават резервации уште од пред една седмица. Им се нудат различни програми и менија.

„Од храна имаме разно разни ордевери, топли и ладни даски, морски специјалитети, дивеч и се разбира со тоа оди и квалитетно вино“, вели еден менаџер на угостителски објект.

Многумина ќе останат во своите домови. Дури и странците слушнале за оваа традиција, па можеби ќе се приклучат на прославувањето.

„Ја славиме Стара нова година. Нема да одиме во кафеана, ќе пославиме дома.“

„Знам дека го славите Божиќ и Нова година малку подоцна од другите.“

„Јас прославив пред тринаесет дена“, велат анкетираните.

Според овој календар новата година почнува со Василица. Некои ја празнуваат како домашна слава, а оние кои го носат името на Свети Василиј Велики го слават својот именден. Слично како и на Бадник, на семејната трпеза се крши погача со паричка. Се верува дека на оној што ќе му падне, годината ќе му биде среќна и бериќетна.

Покрај Македонската православна црква, според Јулијанскиот календар, верските празници ги слават и Руската и Српската црква, Ерусалимската патријаршија и дел од калуѓерите на Света Гора. За разлика од нив, по Грегоријанскиот календар се водат Грчката, Бугарската, Романската, Украинската и Грузиската православна црква.

Фиљана Кока