Аневски: Јанева отстрани двајца обвинители
Конфронтирање во Специјалното јавно обвинителство откако обвинителката Јанева исклучила двајца од своите колеги, кои за тоа го известиле претседателот на Советот на обвинителите Аневски. Ќе се испитува случајот, а ќе се анализира и предавањето на прислушуваните разговори во Специјалното јавно обвинителство, доставени од лидерот на СДСМ, Заев.
„Специјалната обвинителка Катица Јанева отстрани двајца од нејзиниот тим без никакво решение, ниту постапка“- вели претседателот на Советот на јавни обвинители, Петар Аневски. На Лејла Кадриу од тетовското Основно јавно обвинителство и на Марија Ѓоревска од скопското им биле одземени предметите. Двете обвинителки пред неколку дена се пожалиле за ова во Советот, а на истата адреса стигнало и известување од Јанева со образложение.
„Дека тие сами побарале да заминат и поради намален обем на работа, значи биле многу јавни обвинители, па решила да ги отстрани овие две, што мислам дека воопшто не држи и не е во ред. Знаете дека еден месец наназад околу бројот на јавни обвинители, ние викавме дека се многу, и излезе точно тоа што го тврдевме. Советот формира Комисија и потоа ќе донесеме решение“, изјави претседателот на Советот на Јавни обвинители, Петар Аневски.
Советот на денешната седница донел одлука Јанева да ги достави сите информации и податоци за примените транскрипти и аудиовизуелни материјали за незаконски снимените разговори.
„Нѐ интересира бројка, статистика, колку и дали има примено, дали е составен записник или друг акт, дали има потврда за примени предмети итн. Донесовме одлука да се побараат тие податоци и најкраток можен рок да ни ги достават“, вели Аневски.
Деновиве Јанева ќе биде повикана во Советот кој ќе направи анализа дали има потреба од нова корекција на бројот на членови на тимот.
Наташа Гркова- Петрушевска