Поддршка за 181 проект од областа на заштитата на недвижното културно наследство

Во областа на заштитата на недвижното културно наследство, во 2016 година преку Годишната програма на Министерството за култура се поддржани 181 проект, од кои реализацијата на 163 е во надлежност на националните установи, конзерваторски центри и заводи за заштита на културното наследство. Останатите се проекти предложени од други корисници, како институти, локални установи, здруженија на граѓани.

Главен акцент во Програмата има континуираната опсервација и заштита на недвижните споменици на културата со поддршка на проекти кои се однесуваат на санација, реставрација на сакрални и профани градби, фрескоживопис, како и проекти за валоризација и ревалоризација на споменичните добра, а се поддржани и проекти за адаптација и ревитализација на одделни споменици на културата во современи простори за промоција на културата.

Петта година по ред ќе продолжи проектот за обнова на фасадите во старите градски јадра, а меѓу позначајните проекти поддржани во Годишната програма се: заштита на Коџа Мехмед џамијата во Табановце; реконструкција на куќата на Татарчеви во Ресен и нејзина адаптација во музеј, која треба целосно да биде реализирана оваа година; адаптација на објектот Јени џамија во современ галериски простор; обнова на на манстирскиот комплекс Трескавец; непосредна заштита на споменикот „Илинден“ во Крушево и обнова на конаците во манастирот Св. Никола во скопско Љубанци.