Низ Македонија ќе поминат толку мигранти колку што ќе прими ЕУ

„Колку мигранти ќе влезат во Македонија, зависи од тоа колку ќе бидат примени во земјите на Европската унија“ - изјави министерот Попоски по средбата со неговиот австриски колега Себастијан Курц во Скопје. Рече дека Македонија е подготвена да ги преземе сите неопходни мерки за справување со кризата во координација со земјите низ кои минуваат бегалците. Гостинот предупреди дека Австрија за некој месец ќе го постигне максималниот број мигранти по што ќе мора да го стопира нивниот влез. „Македонија мора да биде подготвена на ваков чекор“, порача шефот на австриската дипломатија.

„Македонија мора да биде подготвена комплетно да го стопира влезот на мигрантите во нејзините граници, по Грција таа е првата држава која се соочува со мигрантите. Оттука знаеме дека oва е тешка задача и се договоривме дека Австрија ќе даде своја поддршка и тоа не само во форма на персонал од полицијата и војската туку и во опрема за да ѝ се овозможи на Македонија да се справи со предизвикот“, изајви Курц.

„Ја обезбедивме границата и ќе продолжиме да ја обезбедуваме и со помош на повеќе партнерски земји и Австрија, таа контрола ќе биде доведена на ниво на кое максимално ќе спречиме каков било влез. Единствениот начин за влез во Македонија ќе биде на место кое е легално обележано. А бројот на влезови ќе зависи од бројот на луѓе прифатени од ЕУ“, нагласи Попоски.

Дали ќе се отворат дополнителни кампови, според Курц, зависи од политиките што ќе ги водат државите кои се цел на бегалците. За решавање на политичката состојба во земјава, австрискиот министер ги повика Владата и опозицијата да ги почитуваат договорирте за да може да се обезбедат слободни и фер избори.

Викторија Милевска