„Ало докторе“: За една недела 1.499 повици

На телефонската линија 02/15 123 за медицински совет „Ало докторе“ изминатата недела (од 15 до 21 февруари) имало 1.499 повици, соопшти Здравствен дом Скопје. 

Од 15 септември 2014 година кога почна да работи линијата, досега, имало 78.271 повици.

Линијата е достапна секој ден 24 часа со цел да се овозможи непосредна медицинска консултација во моментот на појава на различни симптоми на нарушување на здравјето.

Дваесет и пет доктори вкупно се достапни за медицински совет. Повиците се од граѓани од сите градови на Македонија.

Јавувањата се за широк спектар на најразлична симптоматологија, најчесто за главоболки, сезонски настинки, зголемен крвен притисок, симптомна болка, зголемена телесна температура и кашлици од променливото време.

На сите оние лица кои побарале медицински совет на телефонската линија „Ало докторе“ им е дадена здравствена помош со совет и соодветна симптоматска терапија.