Јолевски: Армијата ќе биде ангажирана ја јужната граница додека има потреба за тоа

Армијата останува на јужната граница се додека има потреба за тоа. Во зависност од проценките на теренот и бројот на бегалците, не се исклучува можноста и за зголемување на бројот на војниците и старешините, вели министерот за одбрана Јолевски. Потенцира дека АРМ на теренот само и асистира на полицијата која е одговорна за безбедноста на границите. Како што е познато, рече Јолевски, во сила е одлуката за кризна состојба на дел од јужната граница. Она што е повеќе од неопходно е помошта од Европската унија во материјално-технички средства.

„Во овој момент на нашата јужна граница имаме околу 200 војници, а во зависност од потребите тој број може да се зголеми, но предвидено е да се ангажираат до 1000 војници доколку има потреба“, изјави министерот за одбрана Зоран Јолевски.

Македонија и Босна и Херцеговина активно соработуваат преку размена на безбедносни информации во превенирањето на заканите од тероризмот и од ИСИЛ. Како што вели босанската министерка за одбрана Пендеш, клучно е да се занимаваме со причините. Иако Босна и Херцеговина не е дирекно засегната со бегалската криза,  неопходна е меѓусебната помош. За стабилен регион, поребно е и евроатлантско интегрирање на земјите од Западен Балкан.

„Што се однесува до борбата против тероризмот, може да размениме одредени искуства и тоа ни е заедничка цел. Тероризмот не е врзан за држава, ниту за регион. Тој е глобален светски проблем. Битно е да се занимаваме со причините, а не со последиците и крајно време е да си помагаме и во однос на бегалската криза“, изјави Марина Пендеш, министер за одбрана на Босна и Херцеговина.

Соработката меѓу двете држави во одбранбениот сектор е одлична, заклучија двајцата министри. Посебен акцент е ставен на военото образование. Неколку години наназад, босански питомци се школуваат на Воената академија во Скопје. Таква можност дава и регионалниот центар за обука на пилоти. 

Милчо Велески