Доналд Туск на средба со претседателот Иванов

Постигнување на заедничко европско решение за бегалската криза, ова бил фокусот на разговорите на претседателот Иванов и неговиот гостин- претседателот на Европскиот совет, Доналд Туск. Состанокот започна со тет-а-тет средба на претседателот и Туск, а потоа се сретнаа и двете делегации.

Посетата на Туск на земјите низ кои се протега Западно-балканската мигранстка рута е во контекст на неодамнешната одлука на Самитот на Европскиот совет да се врати ситуацијата кога сите членки на Шенген зоната „целосно ќе го применуваат шенгенскиот граничен кодекс и ќе одбијат влез на надворешните граници на државјани на трети земји што не ги исполнуваат условите за влез или кои не доставиле барање за азил и покрај тоа што имаа можност да го сторат тоа“.

Како најава за посетата на Скопје и други земји од Западен Балкан, Европскиот совет испрати соопштение во кое нагласи дека за реставрација на целосното функционирање на Шенген зоната ќе биде потребно време и тоа мора да биде придружено со мерки за решавање на хуманитарните последици на земјите- членки што се погодени, како со хуманитарна помош за сириските бегалци и за земјите од соседна Сирија.

Првиот човек на Евросоветот до 3-ти март, покрај Скопје, ќе ги посети и Виена, Љубљана, Загреб и Атина. Целта на оваа негова мини турнеја, според соопштението од советот на ЕУ е „градење на европски консензус за справување со миграциската криза и подготовка на Самитот со Турција закажан за 7-ми март во Брисел и самитот на Европскиот совет на 17-18 март“.

Челникот на Европскиот совет исто така ќе се сретне и со генералниот секретар на НАТО, Јенс Столтенберг и со извршниот директор на Фронтекс, Фабрис Легери и тоа во петок (4-ти март) во Брисел.

Катерина Топалова