Жени во бизнисот: Најмногу во микро фирмите, само 12% на менаџерски позиции

Жените се доволно храбри и самоуверени да почнат бизнис, но проблем е недоволната едукација за успешно раководење и ширење на бизнисот. Третина од почетниците во бизнисот се од понежниот пол, но најчесто почнуваат во микро- сегментот со еден до двајца вработени. Ретки се жените на врвни позиции во големите компании.

„За жал немаме доволно жени на менаџерски позиции. Имаме околу 12% на менаџерски позиции. Меѓутоа ако земеме дека повеќето се во институции и установи како што се училишта, градинки и слично, ќе сватиме дека во приватниот сектор ни недостасуваат жени на управувачки позиции, а уште помалку имаме жени  на управувачки позиции во поголемите компании и во оние што котираат на берзата“, изјави Валентина Дисоска, Здружение на бизнис-жени.

„Најголем дел од микро и малите претпријатија се раководени од жени. Од новоотворените компании, над 30% ги отвораат жените. Можеме да кажеме дека им недостигаат ресурси“, вели претседателката на ССК, Данела Арсовска.

Во управните структури на бизнис- асоцијациите има доволно жени, но ретки се на  управувачките позиции.

„Треба да се борат, треба да преговараат, да не бидеме секогаш во процес на борба, туку во договарање, дека еднаквоста е и во платите и во функциите и во извршувањето на задачите треба да биде навистина запазено“, изјави Миле Бошков, Бизнис конфедерација на Македонија.

На земјава не ѝ треба поделба на машки и женски бизниси, туку родова еднаквост во која пресуден ќе биде квалитетот на индивидуата, а не полот, велат жените од бизнисот.

Свето Николовски