“Државно земјиште во Струмица”

24.01.2014 16:54

Министерството за транспорт...

Министерството за транспорт ја спречило продажбата на државното земјиште во Струмица. Според документите, Министерството испратило укажување до општина Струмица, дека при определувањето на почетната цена на електронското јавно наддавање за државното земјиште, не биле земени предвид компатибилните класи за намена на земјиштето, со што се оштетуваат општинскиот и државниот буџет за над 58 милиони денари. Од Транспорт и укажале на Струмица оти продажбата е спротивна на Законот за градежно земјиште и на Уредбата за висината на цената.

 

Од Министерството за транспорт за МТВ потврдуваат дека поништувањето на објавата за оттуѓување на земјиштето се случила дури откако укажале на тоа дека со неа се оштетуваат општинскиот и државниот Буџет.

Министерството ги утврдило неправилностите откако негови службени лица спровеле надзор во Општината, на објавите и спроведените постапки за оттуѓување градежно земјиште.

 

Инаку, на електронското јавно наддавање за  земјиштето со површина од 66 илјади 450 квадратни метри, со почетна цена од 1 евро за квадрат, била постигната цена од само 71 денар, по што купувачот, за кој неколку медиуми наведоа дека е бизнис – партнер на Заеви, го продал земјиштето за шестпати повисока цена. Владејачката ВМРО-ДПМНЕ обелодени дека истиот бизнис – партнер, освен што бил вклучен во градежната афера,  добил и 11 тендери од Општината, вредни над милион и 600 илјади евра.

 

“Горан Крстев е бизнис – партнер на Вице Заев и семејството Заеви преку фирмата Сара Јавор Инженеринг, а на јавноста познат како еден од осомничените, а потоа и аболициран за аферата Глобал, тешка 8 милиони евра.  Дека тој се уште е бизнис – соработник на Заеви говори последниот скандал за недозволена продажба на градежно земјиште по само 1 евро за квадратен метар”, изјави Александар Колев, ВМРО-ДПМНЕ

 

Од општина Струмица вчера реагираа дека објавата за оттуѓување на земјиштето е поништена и дека веќе е склучена и Спогодба за раскинување на договорот. Појаснија дека овие парцели се уште се во сопственост на Република Македонија.

 

Мартин Пушевски