Закуп на државно земјиште поголемо од три хектари
За 14 општини меѓу кои Струмица, Битола, Штип и Велес е објавен оглас за давање под закуп на државно земјоделско земјиште. Се нудат површини поголеми од 3 хектари, а распределбата ќе биде по пат на електронско јавно наддавање.
Понудени се вкупно скоро 800 хектари од кои поголемите површини се во Штип 340, Струмица 120 и Велес 64 хектари.
Парцелите се наменски за сточарите, односно за производство на добиточна храна, житни, фуражни и индустриски култури за период до 15 години.
Големината на површината која може да се даде под закуп на еден учесник се утврдува врз основа на бројот на добиток и може да изнесува од 0,6 до 20 хектари.
Право на учество на јавниот оглас имаат домашни физички и правни и странски правни лица кои мораат да достават и банкарска гаранција. Изборот е со електронско јавно наддавање, а понудите се поднесуваат во рок од 60 дена од денот на објавувањето на огласот.
Методија Трајков