Раст во сите сегменти во работењето на ФЗОМ во 2015 година

Претставен извештајот за работата на Фондот за здравствено осигурување за 2015 година. Според директорот Стефановски, се бележи раст во сите сегменти, зголемен е буџетот, издавањето рецепти, и на барањата за ин витро оплодување. Буџетот на фондот за лани бил 24,2 милијарди денари, а годинава е зголемен за 1,4 проценти.

Анализирајќи го буџетот на ФЗОМ во последните 9 години, истиот се движи од 16,4 милијарди денари во 2007 година до 24,2 милијарди денари во 2015 година, што е значително зголемување. Годишно средствата за наведените години, бележат просечен пораст од 961,8 милиони денари секоја година. Трендот на зголемување продолжи и во 2016 година и порастот е околу 1,4 милијарди денари со вкупен буџет од 25,6 милијарди денари, истакна директорот на ФЗОМ, Сашо Стефаноски.

Потенцира дека нагорен тренд исто така бележат и буџетите на 113-те јавни здравствени установи за 2015 година и тој изнесува 12,8 милиони денари и додаде дека вкупната вредност на буџетите за ЈЗУ е зголемена за околу 5,4 отсто, а трендот на зголемување продолжува и годинава. Фондот во 2015 година за 2.638 приватни здравствени установи, појасни Стефаноски, исплатил 7,3 милијарди денари, што е зголемување од околу 380 милиони денари или приближно 5 отсто споредено со претходната година.

Осврнувајќи се на сегментот аптеки и снабденост со лекови, тој рече дека на секои 10.000 осигуреници има по 4,35 аптеки, а за споредба просекот во Европа е 3,03 аптеки на 10.000 жители, што покажува дека во Македонија достапноста на лекови е на високо ниво.