Попоски на министерски состанок во Солун

Македонскиот министер за надворешни работи, Никола Попоски денеска и утре во Солун ќе учествува на министерски состанок посветен на прекуграничната соработка во контекст на кризата со бегалците и мигрантите.

На состанокот по иницијатива на шефот на грчката дипломатија Коѕиас, ќе учествуваат и министрите за надворешни работи на Бугарија и на Албанија, Митов и Бушати.

Во петок ќе има разговори меѓу министрите или претставници на министерствата за внатрешни работи на четирите земји, по што ќе се одржи и заеднички состанок на министрите за надворешни и за внатрешни работи.

Состанокот во Солун е со цел зајакнување на дијалогот и проширување на перспективите за понатамошна прекугранична соработка во областа на координацијата и справувањето со заедничките предизвици, како што се бегалската и миграциската криза.