10,7% раст на индустриското производство во првиот квартал

Продолжува трендот на раст на индустриското производство. Според податоците на Државниот завод за статистика, индустриското производство во март 2016 година, во однос на март минатата година, забележува раст од 8,9%. Во првиот квартал, односно во периодот јануари - март 2016 година, во однос на периодот јануари - март 2015 година, индустриското производство пораснало за 10,7%. Исотвремно, бројот на работниците во индустријата во првиот квартал се зголемил за речиси 2%.

Гледано по сектори, индустриското производство во секторот Рударство и вадење на камен во март 2016 година, во однос на март 2015 година, бележи опаѓање од 7,5%, во секторот Преработувачка индустрија, бележи пораст од 15,4%, а во секторот Снабдување со електрична енергија, гас, пареа и климатизација опаѓање од 14,2%.

Порастот во секторот Преработувачка индустрија е резултат, пред сѐ, на зголеменото производство во следните оддели: Производство на прехранбени производи, Производство на пијалаци, Производство на облека, Производство на други неметални минерални производи, Производство на машини и уреди, неспомнати на друго место, Производство на електрична опрема и Производство на моторни возила, приколки и полуприколки.

Според главните индустриски групи, производството во март 2016 година, во однос на март 2015 година, бележи пораст кај Интермедијарни производи, освен енергија за 3,2%, Капитални производи за 63,6% и Нетрајни производи за широка потрошувачка за 5,4%, додека опаѓање бележи кај Енергија за 19,9% и кај Трајни производи за широка потрошувачка за 26,8%.