Банкарите тврдат- штедните влогови се сигурни и стабилни

Нема потреба за паника кај штедачите затоа што штедните влогови се сигурни и стабилни, а банките ликвидни, порача банкарскиот еснаф од стопанската комора. Банкарите со појаснување, адекватноста на капиталот на домашните банки е двојно повисока од законски бараната, а ликвидноста висока и може да одговорат на сите потреби на фирмите и на граѓаните.

„Во моментов банките имаат вишок ликвидни средства и се подготвени да ги сервисираат сите потреби на граѓаните. Штедните влогови во банките се сигурни и стабилни“, изјави Коста Митровски, претседател на Здружението за банкарство при Стопанската комора на Македонија.

Централната банка во неколку наврати потсети дека домашниот банкарски систем е стабилен и безбеден со изразена ликвидност која може да одговори на сите потреби. Гувернерот Богов повтори дека денарот е стабилен и нема простор за загриженост, а шпекулациите за наводна девалвација кои се оркестрирани и посилни од порано ги нарече неосновани.

„Целта е нарушување на макроекономската стабилност. Народна банка има доволно моќни инструменти со кои може во секое време да го одбрани курсот на денарот доколку е предмет на напад. Во последните 5 години имаме исклучително низок дефицит во платниот биланс, кој е основен индикатор кој покажува, дали на земјата и недостигаат девизни средства“, вели гувернерот на НБРМ, Димитар Богов.

Банкарите со порака, депозитите во април продолжуваат да растат, а со тоа и кредитирањето. Шпекулациите за немање доволно евра во менувачниците се невистинити.

„Банките имаат доволно готовина во евра, и граѓаните и фирмите можат да купат неограничени количества за нивните потреби“, нагласува Митровски.

Банкарите потсетија дека ќе биде поддржан секој профитабилен проект на фирмите со прифатлив ризик, а вишокот ликвидност се пласира во благајнички записи.

Свето Николовски