Атинската берза се приклучува на СЕЕ Линк

По Белградската и Љубљанската берза кои поднесоа апликација за пристап во СЕЕ Линк во февруари оваа година, Бањалучката берза тоа го направи во март, овој месец апликација за членство во СЕЕ Линк поднесе и Атинската берза.
   
Вклучувајќи ги трите берзи основачи - Загребската, Македонската и Бугарската берза, СЕЕ Линк сега се проширува на вкупно 7 пазари.

Како што е познато платформата за пренасочување налози за тргување СЕЕ Линк стана целосно оперативна на крајот на март оваа година. Двата индекси на СЕЕ Линк SEE LinX и SEE LinX EWI беа лансирани на почетокот на април, а во нивниот состав влегуваат 10-те најтргувани хартии од вредност котирани на трите берзи - основачи. Движењето на овие индекси може да се следи преку сајтот на СЕЕ Линк www.see-link.net

СЕЕ Линк платформата моментално поддржува тргување со хартии од вредност на бугарскиот, хрватскиот и на македонскиот пазар.