Охрид полн со туристи за празниците

Охрид ќе биде полн со туристи во текот на продолжениот празничен викенд. Хотелите во просек ќе бидат искористени околу 80 проценти, а солидно ќе се исполнат и индивидуалните сместувачки капацитети. Во текот на велигденските и првомајските празници охриѓани за гостите ќе приредат добра забава, а посебна атракција за нив ќе биде Велигденскиот саем кој беше отворен вчера. Кај стариот  охридски чинар тие ќе можат да купат рачно изработени предмети, украси, накит, сувенири и пекарски производи.

„Има туристи кои што купуваат вакви јадења и баш ни е мило. Претежно кифлите и комадот ги бендисуваат, традиционалните јадења.“

„Ние сме македонци што живееме во Албанија. Супер е овде за велигденските празници и сега почнувам да купувам. За многу години. “

„Супер е, многу е убаво овде , овој пат ми се чини подобро е организирано од лани и оломнани. Ја подржуваме оваа акција.“

„Многу ме бендисува, убаво е организирано“, велат посетителите.

Велигденскиот саем има хуманитарен карактер, а со прибраните средства ќе им се помогне на социјално ранливи семејства.

„Суштината на организација на оваа манифестација е да ги подучиме најмладите генерации во Охрид уште од мали нозе да ги негуваат основните човекови, хумани, етички и традиционални вредности“, вели градоначалникот Никола Бакрачески.

„Сакаме да помогнеме на оние семејства на кои им е потребна помош, односно кои што треба да го осетат духот на Велигденските празници“, изјави Тони Коталески, директор на Ј.П. Градски пазар.

Викендов во Охрид најбројни ќе бидат домашните и туристите од соседните земји, а веќе на трети мај со чартер лет ќе допатува првата група туристи од земјите на Бенелукс, со што и официјално ќе биде отворена туристичката сезона.

Сашо Нелоски