Мисајловски: Во Македонија сите одобренија во градежништвото се издаваат електронски

Реформите спроведени во Македонија во делот на електронско издавање градежни дозволи презентирани на меѓународна конференција во Тирана. Од 1-ви јуни 2013-та година, постапката за издавање одобрение за градење за сите видови градби во Република Македонија се спроведува на електронски начин преку Информациски систем е-одобрение за градење, а од 1-ви ноември 2013-та година преку истиот систем на електронски начин се спроведуваат и сите останати постапки за добивање одобренија во делот на градежништвото, рече министерот за транспорт и врски Владо Мисајловски во своето обраќање на конференцијата „Е-дозволи за конкурентен регион“, што се одржува во Тирана, Република Албанија.

Главната цел на овој информациски систем е овозможување брзо и ефикасно поднесување на барањето за добивање одобрение за градење, како и другите барања предвидени со Законот за градење, без при тоа да се доаѓа во институциите, увид во секоја фаза од постапката, целосна информираност на барателот, увид во роковите за постапување, како и намалување на трошоците на постапката, истакна Мисајловски.

Со воведувањето на оваа реформа, додаде, Република Македонија е рангирана на 10-то место во светот и на прво место во Европа и Централна Азија, во последниот Извештај на Дуинг Бизнис, на ранг листата за ефикасно спроведување на постапката за издавање одобрение за градење.

Во својот говор, потенцира дека со размената на податоци што се спроведува во електронска форма преку овој систем се редуцираа бројни административни процедури кои претходно се спроведуваа, со што, како што нагласи, се придонесе за значително скратување на роковите за издавање одобрение за градење.

Меѓународната конференцијата во Тирана е втора од овој вид и се организира со цел да се презентираат предностите на електронското издавање градежни дозволи. Покрај министерот Мисајловски, на конференцијата присуствуваат и министрите за транспорт, инфраструктура и просторно планирање на Република Албанија, Црна Гора, Косово, Хрватска, Словенија и Босна и Херцеговина.