Расте бројот на холандски туристи
Македонија е прекрасна дестинација која што има огромен потенцијал за развој на туризмот. Ова е заклучокот на менаџерите на холандскиот тур-оператор „ТУИ“ од Холандија по посетата на нашата земја. Според нив, бегалската криза и актуелните состојби во земјата за кратко придонеле да се намали продажбата на аранжманите за Македонија, но тоа е надминато и годинава тие очекуваат зголемување на бројот на туристите од Холандија во нашата земја...
Македонија е сеуште неоткриена дестинација за повеќето европјани. Земјата нуди бројни изненадувања и има огромни потенцијали, но сепак она по што се издвојува од сите други познати туристички дестинации во светот се пријателството и љубезноста на домаќините. Ова се впечатоците на топ-менаџментот на холандскиот тур-оператор „ТУИ“ по посетата на нашата земја.
„Покрај културата и пријателството што веќе го споменав, 365 цркви, вкусот, природата, можностите за спорт што Македонија ги нуди, возење велосипед, планинарење, параглајдинг, се тоа ја прави оваа земја посебна“, вели Жак Крејнен, „ТУИ“- Холандија.
Политичката ситуација во земјата и претходно бегалската криза имаше влијание на продажбата на аранжманите. Но состојбата на туристичкиот пазар во Холандија е стабилизирана и се очекува враќање на состојбите од првиот квартал од годината.
„Луѓето кои се на одмор тука сватија дека имаат одмор без да се вклучени во некаков вид проблеми. Тоа е секако позитивен имиџ за земјата. Направивме една интензивна маркетинг кампања која позитивно влијаеше. Луѓето сваќаат дека ситуацијата не е критична“, изјави Аријан Керс, генерален менаџер на „ТУИ“- Холандија.
„Ние бележиме 20% пораст за првиот квартал во однос на холандските туристи и 30% во однос на посети и 20% во однос на ноќевањата. Ова се бројките за првиот квартал од годината, а се надевам дека и во вториот квартал ќе оствариме некаков пораст“, изјави Лела Крстевска- директор на Агенцијата за промоција и подршка на туризмот.
Во моментот „ТУИ“ има 4 лета неделно за Македонија, а менаџментот на тур- операторот очекува во шпицот на туристичката сезона бројот на чартер летовите да се зголеми на 5 или 6 неделно.
Сашо Нелоски