Анкета на „Брима Галуп“: ВМРО-ДПМНЕ со предност пред СДСМ

Втор дел од анкетата на „Брима Галуп“ изготвена на барање на неделникот „Република“. Доколку гласањето е задолжително со закон, 27,1 насто од испитаниците би гласале за ВМРО-ДПМНЕ, а за СДСМ 15,8 проценти. Според анкетата, доколку се издвојат одговорите на Македонците, владејачката партија има двојно поголема предност пред СДСМ.

И лидерот на ВМРО-ДПМНЕ, Никола Груевски ужива двојно поголема довербата кај граѓаните во однос на лидерот на СДСМ, Зоран Заев. 20,9 насто од испитаниците се изјасниле дека најмногу му веруваат на Груевски, а 10,2 проценти на Заев.

Кај македонските испитаници, 30,8 насто му веруваат на Груевски, а 12,1 на Заев. На прашањето „на чиј збор и ветување повеќе им верувате“, 32,8 проценти се изјасниле дека веруваат во ВМРО-ДПМНЕ, а 15,3 рекле дека повеќе му веруваат на СДСМ. И во однос на прашањето за проблемот со името, ставот на испитаниците е ист, 26,3 проценти сметаат дека ВМРО-ДПМНЕ подобро би се справила, а 13 насто веруваат дека тоа е СДСМ.

Според анкетата, 62 проценти од граѓаните не би прифатиле промена на името со додавање географска одредница, со цел да влеземе во ЕУ и во НАТО, додека 31,3 проценти би прифатиле промена на името.

Голем е процентот на испитаниците од македонска националност кои не прифаќаат промена на името со додавање географска одредница како услов за влез во ЕУ и НАТО, дури 83,7. Само 11,8 проценти одговориле дека би прифатиле такво нешто.

Анкетата на институтот „Брима Галуп“ е спроведена од 5-ти до 12-ти мај, на 1.006 испитаници.

Милчо Велески