Водовод: Водата за пиење во поплавените подрачја е санитарно исправна

Првичните резултати од испитувањата на водата во поплавените подрачја во скопско укажуваат на санитарно исправна вода за пиење, соопшти денес ЈП Водовод и канализација- Скопје.

Стручни тимови на Центарот за санитарна контрола на ЈП Водовод и канализација – Скопје, Центар задолжен за секојдневен мониторинг на водата за пиење од водоводниот систем на Град Скопје и утврдување на санитарната исправност на истата, во неделата излегоа на терен да извршат теренски мерења и да земат примероци на вода од мерните места, кои ги опфаќаат кризните подрачја, со акцент на зафатените од природната стихија.

Резултатите од сите теренски мерења од аспект на механичко загадување (маснотија) и концентрација на резидуалниот хлор во системот беа во рамките на максимално дозволените концентрации, а лабораториските испитувања покажаа физичко-хемиска и микробиолошка исправност, согласно Правилникот за безбедност на водата за пиење.

Исто така тимови од Центарот и во текот на вчерашниот ден повторно ги посетиле кризните подрачја и земаа примероци од вода за пиење. Првичните резултатите од сите мерења укажуваат на санитарно исправна вода за пиење, соопштуваат од јавното претпријатие.