Македонија и Србија ќе ги изедначат цените на фитосанитарните сертификати за пченицата
Македонија и Србија договорија иста цена на фотосанитарните сертификати за увоз на пченица. Отворените прашања за брашното ќе се решаваат на нов состанок во Белград. Ова е епилогот по средбата меѓу Цветков и Љајиќ. И двете страни посакуваат зголемена меѓусебна соработка и заеднички настап на трети пазари...
Македонија и Србија се договорија- ќе се изедначат цените на фитосанитарните сертификати за да се олесни и да се забрза протокот на стока. Во овој момент, цената на сертификатот кај северниот сосед е 8.500 денари, во земјава 10 илјади. Српскиот министер за трговија Љајиќ и македонскиот за земјоделство Цветков на средба во Скопје разговараа за унапредување на трговската размена.
„Македонија е за нас значаен трговски партнер. Според податоците, во првите шест месеци имаме раст на трговска размена од 13 проценти и според обемот на увозот и според извозот. Треба да се стремиме да ги отстраниме сите царински бариери. Ќе ги изедначиме цените на фитосанитарните уверенија, но треба да се донесе трајно решение за во иднина да не се случуваат вакви работи“, изјави Расим Љајиќ, министер за трговија, туризам и телекомуникации.
Тимови од двете министерства ќе ги решаваат и прашањата за цената на евтиното увозно брашно и пченица. Речиси 95 проценти од увозот е од Србија.
„Проблем имаме и со увозното евтино брашно, чија цена се изедначува со увезената пченица, што е малце нелогично. Но, со министерот Љајиќ се договоривме дека ова прашање денеска не можеме да го решиме, а за истото ќе направиме тимови од двете страни“, изјави министерот за земјоделство, Михаил Цветков.
Решение ќе се бара и за извозот на вино во Србија. Министрите ќе ги решаваат и прашањата во месната индустрија, а се размислува и за заеднички настап на трети пазари.
Дијана Ценевска