Волонтери од цела Македонија несебично помагаат на загрозените
Во поплавените места во Скопско интензивно се спроведуваат акции за расчистување на теренот. Волонтери од цела Македонија доаѓаат во помош на месното население. И по девет дена од стравотното невреме, има уште многу работа – да се извади калта од домовите и од дворовите, да се острани шутот и сметот, да се пробијат сите улички кои водат куќите...
Последни подготовки на средсело. Лопатите на рамо и се тргнува на работа. Стајковци чиниш е Македонија во мало. Нема место од каде што нема волонтери кои дошле да помогнат на загрозените семејства.
„Ете некако од срце и душа чувствувам дека морам да им помогнам на луѓето. Доста денови поминаа, и газдите се веќе изморени, изнемоштени... Со елан работата да ја завршиме“, вели еден волонтер.
„Многу е битна човечноста“, додава друг.
Сѐ уште се изнесува надојдената кал од домовите, од дворовите и околните ниви. Се завршува еден објект, се оди веднаш во друг. Волонтерите велат дека човечноста пред сѐ ги натерала да помогнат на настраданите.
„Кога е добро кој бара помош? Секој бара помош кога е тешко... Кога знаеш дека треба да им се помогне на луѓето, дека е направена голема штета, не е тешко“, вели еден волонтер.
„Секој ден доаѓаме тука, помагаме каде што има потреба. Вчера бевме на 11-та улица, денес тука на 18-та... Да не те лажам, ама можеби 10 кубици кал исчистивме“, додава друг.
„Чест и задоволство треба да ти биде да помогнеш“.
Поплавените сопственици пак на домови благодарни се за секоја помош и фрлена лопата кал или отпад од домот.
„Фала им што дошле да помогнат, инаку сам што можам да направам овде“, изјави сопственик на куќа.
Волонтерите остануваат во поплавените подрачја. Велат и да заминеме дома, утре повторно сме на помош на загрозените граѓани.
Повеќе од една недела, во Стајковци и Сингелиќ каде што се случија и најголемите поплави во Скопско, се чувствува хуманоста. На секој чекор волонтери помагаат на загрозените жители.
Миле Ристески