Отворен нов дом за згрижување стари лица
Во скопската населба Припор отворен нов приватен дом за згрижување 35 стари лица, а ќе се реализираат 20 нови вработувања. Инвестицијата е во вредност од 400 илјади евра. Во државава досега е отворен 21 ваков објект. Ресорниот министер Спасов со апел до заинтересираните да аплицираат за средства за изградба на приватни домови за згрижување лица во третата доба...
35 лица ќе можат да се згрижат во новиот Дом за стари лица во населбата Припор. Отворени се нови 20 работни места. Инвестицијата чини 400 илјади евра. Ова е втора инвестиција од ваков вид во семеен бизнис.
„Станавме бренд, имаме побарувачка за зголемување на капацитетот, и одлучивме да направиме нешто по европски стандарди, се надевам дека успеавме во тоа“, вели Сузана Мајнова, дом за стари лица „Лабос“.
„Нуди можност да опфати грижа на постари лица и од околните места и општини. Она што е важно е дека ова е високо енергетски објект“, вели градоначалникот на општина Кисела Вода, Билјана Беличанец-Алексиќ.
Ова е 21-от приватен старечки дом во земјава. Министерот за труд и социјална политика смета дека интересот за инвестиции од ваков тип е резултат на поволните услови кои се нудат.
„Уште шест нови приватни домови за стари лица се во постапка на основање и очекувам набрзо да започнат со својата дејност. Ги повикувам сите заинтересирани да се обратат во Министерството за труд и социјална политика за да се информираат за поволностите и локациите кои се нудат за продажба“, рече министерот Диме Спасов.
Со отворање на вакви институции, се надминува проблемот од недостиг за згрижување повозрасни лица, смета претседателот на Здружението на пензионери.
„Веќе 630 луѓе има можност да се сместат во овие приватни домови. Веќе двојно се зголеми можноста да се сместуваат старите лица и тоа во современи услови. Мислам дека оваа акција треба да продолжи со поинтензивно темпо“, рече Драги Аргировски, претседател на Здружение на пензионери.
Надлежните велат дека конкуренцијата на домовите за стари лица ќе влијае врз намалувањето на цената и за подобрување на условите во домовите.
Наташа Гркова- Петрушевска