Истражување: Пратениците само понекогаш работат во интерес на граѓаните
Пратениците само понекогаш работат во интерес на граѓаните – вака одговориле повеќе од половина испитаници во истражувањето на Институтот за демократија. Според нив, најважни функции на Собранието се надзорот врз трошењето на буџетските пари, усвојување на што поквалитетни закони и нивна имплементација...
Пратениците во Собранието ги застапуваат личните и интересите на нивните политички партии, сметаат две третини од анкетирните граѓани во истражувањето на Институтот за демократија. 53 насто од испитаниците се на став дека пратениците само понекогаш работат во интерес на граѓаните.
Истражувањето покажало и дека повеќе од половината анкетирани, пред се вработени во приватниот сектор, мислат дека законите во земјава се менуваат често, но и дека пратеничките прашања се користат за рекламирање или за критикување на Владата и на институциите.
Истражувањето покажало дека граѓаните сметаат дека надзорот врз трошењето на буџетските пари, усвојување на што поквалитетни закони и нивна имплементација се најважните функции на Собранието. Наспроти тоа, најмалку значајна функција, според испитаниците е усвојување на голем број законски решенија и законски измени.
Теренското истражување на Институтот за демократија беше спроведено од 1 до 20 јули годинава, на репрезентативен примерок од 1.000 испитаници.
Анита Димитријевска