Смени во МВР, БЈБ и во УБК

Министерот за внатрешни работи Митко Чавков поднесе оставка, соопшти портпаролот на владата Александар Ѓорѓиев. Оставката е прифатена од премиерот Емил Димитриев и е испратена до Собранието. За нов министер за внатрешни, се предлага професорот Оливер Андонов.

Откако ќе биде избрана владата за спроведување на изборите, Андонов ќе стане дополнителен – заменик министер, бидејќи министерското место му припаѓа на СДСМ. Од владата велат дека досегашниот прв човек на МВР, Чавков ќе биде предложен за нов директор на Бирото за јавна безбедност.

На претпладневната седница по нивно лично барање, биле разрешени досегашните директори на Бирото за јавна безбедност и на Управата за безбедност и контраразузнавање, Горанче Савовски и Љупчо Андоновски.

За нов директор на УБК е назначен Владимир Атанасовски, досегашен директор на Управата за финансиско разузнавање.

Се очекува Собранието во текот на денов да ја констатира оставката на Чавков и да се гласа за избор на Оливер Андонов за нов министер за внатрешни работи.