Почна учебната година во Стајковци, училиштето е обновено
Училиштето „Свети Кирил и Методиј“ во Стајковци подготвено ги пречека основците, извршена е неопходната санација на оваа установа. Продолжува обесштетувањето на жителите со авансираната помош...
Во изминатиов месец служеше како кризен штаб, сега ги отвори вратите за учениците. Почна наставата во „Кирил и Методиј “ во скопско Стајковци, за прв пат во клупите седнаа 43 првачиња. По поплавите, училиштето е обновено.
На првачињата им беа донирани ранци, а прибори добија сите деца од училиштето. Се е подготвено и за воведување на дневен престој, се чека зелено светло од Министерството за образование.
Жителите на Стајковци кои сѐ уште не ја добиле авансната помош ги очекуваат новите списоци. Надлежните апелираат - оние кои се уште немаат пријавено штета да го сторат тоа во нивните општини.
Неколку дена на жителите им помагаат и од Здружението на млади правници за да можат побрзо да ги комплетираат потребните документи за пријавување на штетите.
Крајниот рок за пријавување на настанатите штети е утре. Жителите од поплавените подрачја кои досега ги немаат пријавено штетите може да го направат во општините Гази Баба, Арачиново, Илинден, Шуто Оризари и Тетово, или пак во подрачните единици на Министерството за земјоделство шумарство.
Жителите од поплавените места ќе бидат целосно обесштетени.
Наташа Гркова- Петрушевска