Собрание: Расправа за нов министер за внатрешни работи по оставката на Чавков
Во Собранието расправа за нов министер за внатрешни работи откако Митко Чавков поднесе оставка. Предлогот за неговото место е професорот Оливер Андонов. Чавков ќе оди во Бирото за јавна безбедност, а нов директор добива и УБК...
Министерот за внатрешни работи Митко Чавков поднесе оставка. За неговото место е предложен професорот Оливер Андонов. По изборот на новата влада која ќе треба да ги спроведе изборите, Андонов ќе стане дополнителен заменик- министер, бидејќи министерското место оди во рацете на кадар од СДСМ.
Од Владата велат дека досегашниот прв човек на МВР, Чавков, ќе биде предложен за нов директор на Бирото за јавна безбедност. На претпладневната седница по нивно лично барање, биле разрешени досегашните директори на Бирото за јавна безбедност и на Управата за безбедност и контраразузнавање, Горанче Савовски и Љупчо Андоновски. Нов директор на УБК е Владимир Атанасовски кој досега раководеше со Управата за финансиско разузнавање.
Во Собранието попладнево пратениците расправаа за изборот на новиот министер. Претеникот од редовите на СДСМ, Сугарeски ја обвини владејачката ВМРО- ДПМНЕ дека работи спротивно од договореното на лидерската средба. Талат Џафери од ДУИ побара пауза за дополнителни консултации.
Согласно со договорот кој го потпишаа Груевски, Заев, Ахмети и Тачи утре Собранието треба да ја изгласа техничката влада задолжена за спроведување на изборите.
Викторија Милевска