Партиите сѐ уште не ги откриваат адутите за пратеничките листи

Партиите сѐ уште не ги обелоденуваат носителите на пратеничките листи во изборните единици. Образложението е дека сѐ уште било рано да се разговара за тоа кои ќе истрчаат први, но и 19- мината по нив, на кандидатските листи во шесте изборни единици.

Во владеачката ВМРО-ДПМНЕ велат:

„Изборните листи ние ги подготвивме претходно, но стравот од пораз на СДСМ неколку пати ги одложи предвремените парламентарни избори. Од тогаш мина многу време и листите ќе претрпат измени.“

Социјал- демократите пак велат дека за кандидатски листи не се разговара, туку приоритет им е формирањето поширок фронт. 

Прашањето на МТВ, портпаролот Шилегов го смета за спин:

„Болните спинови на ВМРО-ДПМНЕ имајќи го предвид стравот од извесниот пораз по 11-ти декември го прават токму тоа да се разговара за теми кои релно не постојат.“

И додека ДУИ останаа недостапни за коментар, во ДПА велат сѐ уште е рано за тоа кои ќе бидат нивните кандидати за пратеници. Ако Собранието се распушти на 12-ти октомври, партиите треба во дневниот печат кандидатските листи да ги објават на 18-ти ноември. Три дена подоцна, на 21-ви, започнува изборната кампања.

Тоа што е новина во изборниот законик е наместо 30, прагот е подигнат на 40 проценти застапеност на жените на изборните листи. Законот налага на секои три места најмалку едно да припаѓа на помалку застапениот пол и дополнително уште најмалку по едно место на секои десет.

Миле Ристески