Катастар: Со холандска помош ќе се подобрува изработката на просторни податоци

Холандски експерти ќе му помагаат на Катастарот за да се подобри изработката на топографските карти и инфраструктурните посторни податоци. Кралството Холандија донира 68 илјади евра, до февруари се очекува да биде изработена нова Национална стратегија за инфраструктура на просторните податоци.

Според заменик-амбасадорот на Кралството Холандија, Андри Ван Менс, потребата од веродостојни мапи е повеќе од нужна во секојдневниот живот.

Во животот се соочуваме со одлуки како купување на имот или одлука да се гради куќа и во овие ситуации од исклучително знаење е да се имаат веродостојни и добри мапи со помош на кои ќе донесеме исправна одлука, рече Менс.

Имајќи ги предвид достигнувањата во областа на националната инфраструктура на просторни податоци и картирањето, повеќе од сигурно е дека во овој момент поддршката од Кралството Холандија е добредојдена за да со заеднички сили она што го отпочнавме во оваа област и понатаму успешно го развиваме и реализираме, истакна директорот на Агенцијата за катастар на недвижности Славче Трпески.

Соработката меѓу македонскиот и холандскиот катастар трае 10 години.