Иванов- Туск: Проширувањето на ЕУ да продолжи

Предизвиците од мигрантската криза биле тема на средбата меѓу претседателот Иванов и претседателот на Европскиот Совет, Доналд Туск. Иванов истакнал дека Македонија сѐ уште нема пристап до базите на податоци на Унијата за мигрантите и странските борци иако ги штити надворешните граници на Унијата. И покрај предизвиците со кои се соочува ЕУ, Македонија и целиот Балкан треба што поскоро да се интегрира во Европската Унија, со што ќе се консолидира и Унијата, истакнал шефот на државата на средбата со претседателот на Европскиот Совет.

Иванов имаше средба и со премиерот на Кралството Норвешка, на која биле потврдени одличните билатерални односи и норвешката поддршка на македонските евроинтеграции.

„Македонија ќе делува во насока на заштита на националната безбедност. Какво било решение кое вклучува прием и смесување на мигранти и отворање на бегалски кампови во земји кои не се членки на ЕУ нема да биде одржливо и не смее да биде дозволено. Ние немаме ниту капацитет, ниту ресурси за да се справиме со очекуваниот обем на мигранти. Во таков случај, сосема е веројатно дестабилизирање на државата“, изјави претседателот на Република Македонија, Ѓорге Иванов.

Македонија побара заеднички пристап за справување со мигранската криза и за намалување на безбедносните ризици. Ја презедовме одговорноста да бидеме чувар на портите на Европа, истакна претседателот Ѓорге Иванов во обраќањето на пленарната седница за движење на мигранти и бегалци во Обединетите Нации. Шефот на државата упати порака до Европската Унија да и помогне на Македонија, за да Македонија и помогне на Унијата.

Конфликтите се причината за бегалците во светот. Земјите членки на ОН расправаат како да се стави крај на конфликтите и со тоа и на мигранските кризи.

Ирина Гелевска, специјален известувач од Њујорк за МРТ