Вардар тргна со победа кон европскиот врв

Ракометарките на Вардар СЦБТ ги отворија натпреварите од главната групна фаза во ЛШ со триумф над германскиот претсавник Турингер со 31-25 (16-13). Не изгледаше се така лесно и убедливо долу на теренот како во најавите и прогнозите пред натпреварот. Нашиот првак мораше да одигра максимално и во континуитет подеднакво квалитетно и во напад и во одбрана и со најголема концентрација против упорните и брзи германки , кои без комплекси и почит го одиграа овој дуел против фаворитот.

Избраничките на Индира Кастратовиќ го кршеа отпорот на гостинките речиси цело прво полувреме кое го завршија со три гола позитива  ( 16-13 ), откако германскиот состав по 11 минути поведе со 6-4 а до 28-та минута одржуваше неизвесност и резултатска рамнотежа.

По којзнае кој пат Суслина со 18 одбрани,  на голот беше инспиратор и предводник на одбраната која во вториот дел решавачка за воведното славје на вардарки во оваа фаза од ЛШ. Македонскиот шампион константно ја зголемуваше предноста и ја намалуваше тензијата околу победникот со зголемување на темпото и со намалување на грешките и кризните периоди. За 8 минути во продолжението на семафорот стоеше 20-14, најголемата разлика и најдобра најава за исходот на мечот.

Во тој период офанзивно одигра на ниво Дмитровиќ, која беше најефикасна во нашиот тим со 6 гола а свој придонес во контранападите кои конечно го разбија противникот имаше и Радиќевиќ која застана исто така на 6 гола. Најефикасна за натпреварот и кај Турингер беше чешката ракметарка Лузумова со 8 гола. Наредната недела во втората рунда полуфиналната група, Вардар СЦБТ му гостува на Савехоф во Шведска.