Со спектаклот „Клеопатра“ примабалерината Мијалкова одбележува 25 години уметничка дејност

Клеопатра- најмистериозна жена на античкиот свет, легендарна освојувачка на срцата, љубовница на Цезар и Марко Антонио, последна владетелка на Египет, низ балетска игра ќе ја донесе на сцената на Македонската опера и балет, примабалерината Александра Мијалкова. Таинствената „Клеопатра“ за врвната примабалерина е предизвик со кој ќе го одбележи 25- годишниот јубилеј на сцената. Истакна- чест ми е што мојата кариера ќе ја крунисам со ликот на Клеопатра.

„Мене како балетски уметник ми овозможува да ја истакнам мојата индивидуалност, креативност и танцов сензибилитет“, нагласи примабалерината Мијалкова.

Директорот на МОБ претставата ја најавува како светски спектакл за кој има голем интерес од публиката.

„Претставите на 17-ти и 19-ти се веќе распродадени, имаме трета претстава која е на 23-ти, таа е до половина исто така распродадена. Така да се решивме и за 4-та претстава во месец декември“, изјави директорот на МОБ, Игор Дурловски.

За оваа претстава ангажиран е целиот ансамбл на балетот, хорот и операта. 350 до 400 луѓе работат секојдневно на подготовката на оваа претстава. На сцената заедно со „Клеопатра“ ќе се појават уште 150 уметници.

Ана Јосифоска- Тодоровска