Продолжуваат протестите против Трамп

Новоизбраниот американски претседател Доналд Трамп ги почна разговорите во Белата куќа за преземање на власта од сегашната администрација. По средбата со Барак Обама, нареден чекор е дефинирање на составот на новата влада која, според аналитичарите, ќе ги опфати најлојалните поддржувачи на предизборната кампања на Трамп.

Средба одржаа и потпретседателот Бајден и неговиот наследник Мајк Пенс. Во однос на приоритетните задачи кои демократот Бајден му ги предава на републиканецот Пенс, посебен акцент бил ставен на односите со НАТО и со Источна Европа.

Клучните обврски ја опфаќаат и состојбата на средната класа во САД која треба да се подобри во новата администрација. Инаку, протестите против Трамп продолжија и втор ден по ред. 

„Овде сум зашто имам одговорност како бела жена од САД. Имам обврска да зазезам став и за себе и за другите кои се засегнати од власта на Трамп. Не постои оправдување за оние кои се рамнодушни.“

„Шокирана сум од избориве. Луѓето ги изразуваат бесот и емоциите, шокот низ кој минуваме сите. Одлично е што сме вака сплотени“, велат дел од демонстрантите.

Полицијата во Портланд мораше да интервенира за да ги смири агресијата и вандализмот. Демонстрации против Трамп се најавени и во текот на претстојниот викенд.