Почна откупот на тутунот, се очекуваат повисоки цени
Преку 28 илјади македонски тутунари очекуваат повисоки цени зашто родот е квалитетен. Од 10-те откупувачи, моментално тутун купуваат три фирми. Другите треба да достават бонитет. Реколтата е тешка околу 20.000 тони.
Почна да се цени на вага трудот на тутунарите. Откупната кампања е отворена. Стигнуваат првите реакции по процената. Други го чекаат својот ред и големите очекувања.
Годинашнава реколта тутун тешка околу 20.000 тони е квалитетна. Тутунарите очекуваат повисока цена од ланската.
Од 10-те, откупот го почнаа три откупни фирми кои имаат обезбедено пари. Деновиве треба да почнат и другите, меѓу кои Прилепскиот Комбинат. Крајниот рок е 15-ти декември.
Според Министерството за земјоделство, не се очекуваат проблеми во кампањата.
Од 176 откупни пункта во земјава, отворени се 63. Сојузот на тутунските здруженија ги потсетува откупувачите дека будно ќе се следи процената на тутунот на вагите.
Елизабета Митреска