Сочувство од Иванов до Путин и Гаук

Македонскиот претседателот, Ѓорге Иванов, упати телеграма со сочувство до рускиот претседател, Владимир Путин, по повод атентатот врз рускиот амбасадор во Турција, како и телеграма со сочувство до претседателот на Германија, Јоахим Гаук, по повод терористичкиот напад во Берлин.

„Со шокираност и со чувство на огорченост ја примив веста за атентатот врз амбасадорот на Руската Федерација во Република Турција, Андреј Карлов. Ова ѕверско убиство е напад против сите правила и принципи на меѓународните односи.  Дозволете ми, од името на граѓаните на Република Македонија и од мое, лично име, да ви упатам изрази на длабоко сочувство“, стои во телеграмата од Иванов до Путин.

Во онаа до Гаук, пак, е наведено: „Во овој празничен период, кога треба да го бараме најдоброто кај луѓето, особено е тешко што мораме да се соочиме со најлошата страна на човештвото. Со ваквиот злосторнички чин само се потврдува неопходноста од тесна соработка за справување со тероризмот“- стои меѓудругото во телеграмата од Иванов до Гаук.