13 лица во притвор поради атентатот на рускиот амбасадор
13 се во притвор поради атентатот на рускиот амбасадор. Москва прати 18 истражители за истрагата на убиството, а Путин најави засилување на борбата против тероризмот. Во Руската амбасада во Скопје ќе биде отворена книга на жалост.
Ковчегот со посмртните останки на рускиот амбасадор во Турција, Андреј Карлов, кој беше убиен во Анкара, е префрлен во Москва. Турските власти приведоа 13-мина, а руските пратија тим од 18 истражители кој се вклучува во истрагата за атентатот.
Според претставник на турската влада, нападот бил одлично испланиран и зад него стоела мрежа од луѓе, а не само еден човек.
22-годишниот Мевлут Алтинташ, поранешен полицаец, го застрела амбасадорот Карлов во галерија, наводно поради руската вмешаност во конфликтот во Сирија.
За претседателот на Русија Владимир Путин, атентатот е обид да се влошат односите меѓу двете земји.
„Злосторството е провокација чијашто цел е да се нарушат односите меѓу Русија и Турција, но и мировниот процес во Сирија. Постои само еден одговор на ова-интензивирање на борбата против тероризмот, а бандитите ќе ја почувствуваат на сопствената кожа“, изјави Путин.
Засега нема докази кои укажуваат дека атентаторот бил член на терористичка организација. Властите го поврзуваат со движењето на имамот Фетула Ѓулен, обвинет за неуспешниот обид за државен удар во Турција. Но ѓуленистите негираат каква било вмешаност.
И САД негираат учество во атентатот на Карлов.
„Овие тврдења се бесмислени, апсолутно неточни, немаат никаква основа да бидат вистинити“, вели Џон Кирби, портпарол на Стејт Департмент.
Соединетите Американски Држави времено ја затворија амбасадата поради пукотниците што се случија по атентатот на Карлов. Вашингтон претходно предупреди за можни нарушувања на безбедноста поради серијата напади кои се случија во Турција годинава.
Маја Филдишев