Реципрочни мерки: Русија протерува 35 американски дипломати
Администрацијата на Обама што заминува ја обвини Русија за сите смртни гревови и се обидува нас да не обвини за своите промашувања во надворешната политика.
Русија ќе протера 35 дипломати како одговор на вчерашната одлука на американскиот претседател Барак Обама да протера 35 руски дипломати од САД. Тоа го нагласи рускиот министер за надворешни работи Сергеј Лавров во изјава за медиуми.
Администрацијата на Обама што заминува ја обвини Русија за сите смртни гревови и се обидува нас да не обвини за своите промашувања во надворешната политика. Како што знаете, без основа продолжија да тврдат дека Русија влијаела врз изборната кампања во САД, рече Лавров.
Тој нагласи дека е неопходно да се применат реципрочни мерки.
Нивното објаснување е прилично јасно. Дипломатските претставништва ... ги нарекоа шпионски гнезда. Ние не можеме да не одговориме на такви трикови. Реципроцитетот е закон во дипломатијата и меѓународните односи, истакна Лавров.
Според него, 31 дипломат од Амбасадата во Москва и четворица од Конзулатот во Санкт Петербург ќе бидат прогласени за персона-нон-грата. Рускиот претседател Владимир Путин се очекува да ја потпише одлуката.