Студеното време го наполни пунктот за бездомници „Момин поток“
Бездомниците бараат спас од минусните температури. Студот веќе ја зема првата жртва во земјава - 68 годишен човек, без покрив над глава, беше пронајден мртов во скопската општина Аеродром.
Починатиот 68- годишен бездомник веројатно е првата жртва на поларниот студ. Ова се првичните претпоставки. Телото е дадено на обдукција за утврдување на причините за смртта која ја пријавил негов пријател, исто така, бездомник. Полицијата разговарала и со синот на починатиот.
Според евиденцијата на градската администрација, бездомникот кој починал не ги користел услугите за згрижување. Но, студот и натаму ги демне бездомниците. Засолниште бараат во пунктот за бездомници „Момин поток“ каде што ги добиваат елементарните услови за живот.
Без покрив на главата и борба за опстанок е секојдневието на 48- годишниот Зоран Велјановски. Без родители, животот го минува снаоѓајќи се. Тој е редовен посетител на засолништето во Скопје. Со слична судбина се соочува 42- годишниот велешанец Аце. Низ велешките улици спие на отворено. Во пунктот наоѓа привремен престој.
Црвениот Крст прави план за згрижување на бездомниците и во другите градови. Се прават напори во овие студени денови да се згрижат.
Според градскиот Црвен Крст, во главниот град се регистрирани 148 бездомни лица кои ги користат услугите. Дневно и просечно пунктот го посетуваат 45 бездомници, а од 30 декември поради ниските температури, тој функционира деноноќно.
Наташа Гркова- Петрушевска