Трамп најави нов прес центар надвор од Белата куќа
Новиот американски претседател ја разгледува можноста за нов прес центар што наместо досегашните 50 ќе може да прими над 250 новинари, но надвор од Белата куќа. Ова наиде на негодување кај американските медиуми коишто не се во добри односи со Доналд Трамп. Неколку конгресмени демократи најавија дека ќе ја бојкотираат инаугурацијата. Заврши претставувањето на сите членови на кабинетот во Сенатот.
Нов поголем простор за новинарите во Белата куќа ќе биде една од првите одлуки на новиот американски претседател Доналд Трамп. Многу американски медиуми што не се наклонети на Трамп реагираа дека со ова новиот претседател сака да ги острани новинарите од Белата куќа. Од кабинетот на Трамп велат дека постои голем интерес за следење на работата на Трамп од домашни и странски медиуми, па затоа ја разгледуваат можноста да најдат поголема просторија за брифинзи во зградата Ајзенхауер што е веднаш до Белата куќа.
„Се уште не е донесена одлука за ова. Како што знаете, Белата куќа се протега на 18 хектари. Тимот ми кажа дека има огромен интерес за администрацијата којашто доаѓа. Се разгледува поголемо место од комплексот на Белата куќа на овие 18 хектари за да го задоволи овој интерес. Досегашната сала за брифинзи е прилично мала соба. Наш интерес е да можеме да ги примиме заинтересираните медиуми од земјата и од светот. Работиме на ова за да се покаже нашата транспарентност и слободата на медиумите“, изјави Мајк Пенс, новоизбран американски потпретседател.
Над 60 конгресмени демократи изјавија дека нема да присуствуваат на инаугурацијата на Доналд Трамп, со што се нарушува традицијата на мирна транзиција на власта. Сенаторите демократи најверојатно ќе присуствуваат на инаугурацијата. Сенаторите ги слушнаа ставовите на номинираните кандидати на Трамп за секретар за здравство Том Прајс, секретар за образование Бетси Девос, секретар за трговија Вилбур Рос и секретар за заштита на животната средина Скот Пруит.
Новиот американски претседател Доналд Трамп веќе ги назначи сите членови на неговиот кабинет.
Ирина Гелевска, постојан дописник од Вашингтон за МРТ