Делегација на АРМ на Самит за оклопни возила во Лондон
Началникот на ГШ на АРМ, генерал-потполковник Методија Величковски се обрати на панел-дискусијата на тема „Предизвици со кои се соочуваат командантите на копнените сили, денес и утре, во целиот спектар на окружување“.
Делегација на Армијата на Република Македонија учествува на Самитот на оклопни возила, кој од 23 до 26 овој месец се одржува во Лондон, Обединетото Кралство.
Началникот на ГШ на АРМ, генерал-потполковник Методија Величковски во своето обарќањe на панел-дискусијата на тема „Предизвици со кои се соочуваат командантите на копнените сили, денес и утре, во целиот спектар на окружување“, се осврна на согледувањата од неопходноста на прилагодување на концептот на дејствување на вооружените сили соодветно на сите постоечки форми на закани, чија цел пред се е уништување на воените, политичките и економските цели, преку ерозија на политичкиот систем, без директно ангажирање на непријателските сили во конвенционален напад.
Тој меѓу другото истакна дека и покрај постоечката култура на намалување на воените буџети во корист на зголемување на социјалните трошоци, армиите, како инструмент на националната моќ треба да се прилагодат кон овој нов начин на размислување, односно да ја покажат подготвеноста на воената мудрост за прифаќање на промените.
Способноста за прилагодување на нашата нова безбедносна средина ќе биде од клучно значење, бидејќи светот е сѐ повеќе меѓусебно зависен и бројот и карактерот на заканите се сѐ побројни и посложени, а некои закани дури ги преминуваат националните граници и претставуваат предизвик за благосостојбата на човештвото како целина. Култура на промени, флексибилност и адаптибилност е поважна за трансформирање на војската, од иновациите, посочи Величковски.
На оваа панел-дискусија се обратија и командантот на копнените сили на Армијата на Обединетото Кралство, како и командантот на Југо-источната мултинационална дивизија на НАТО.
На 17-тиот Самит учествуваат околу 500 стручни претставници на владини, армиски и производствени организации од оваа област.
Армијата на Република Македонија, како што е наведено во соопштението, за прв пат со свои претставници, на покана од организатор рамноправно и под уставното име учествува на ваков вид специјализирана светска манифестација.